Aktuelles

Die Tage simmer zwä Sätz vom Ulrich Eckhoff üwwer Siener Originale ins Aug gesprung, wo er schreibt: „Sie sind manchmal merkwürdig, ja absonderlich, oft überspannt und verdreht, mitunter wunderlich, gar schrullig, aber immer irgendwie liebenswert. Leider sind diese ,seltsamen Käuze’, wie wir sie zu nennen pflegen, vom Aussterben bedoht und stehen deshalb auf der Roten Liste der besonders schützenswerten Menschenarten.“

Scheen hott er das gesat, de Eckhoff, awwer dass uns die Originale ausgehn, glaab ich nit. Mir is gleich de Winnie Wieland ingefall.

Letschtens hatt mer die Lydia Anefeld-Paliot von ihre Anfangszeit in Sowwerum vezehlt. Im Saarland gebore unn uffgewachs, is ihr Mann 1975 mit de Bundeswehr no Sowwerum komm. Gleich am Anfang, wie se mit de Kinnerschees im Städtche unnerwechs war, um e Hausarzt ze suche, isse vonneme Passant angesproch worr: Sei Name wär Winnie Wieland unn er det bei Schmidt unn Breug schaffe; ob er ihr irjendwie helfe könnt.

Wie se sat, sie wär uff de Suche noeme Hausarzt, hätt de Winnie geantwort: „E guder Dockter? Do müsse Se bei de Dockter Mann gehn! Komme Se, ich zeij Ihne, wo er sei Praxis hott.“  

Wie se an die Praxistür kame, wär e ausländischer Mitbürjer erausgekomm, hätt gestrahlt unn gesat: „Doktor Mann – gutes Mann!“  

So hott die Lydia Anefeld-Paliot de Winnie kenne gelernt. Wenn se’m später widder begejent is, wär er immer freundlich unn offe gewes. Sie sat, die Sowwerummer wäre jo e nett Völkche, awwer fer Zugereiste wär’s nit änfach, hier Fuß ze fasse. Mehr Winnies müscht’s gewwe!

Mir falle zum Winni sei Schlager in. Die ware sein Ein unn Alles, sei Lewe unn sei Welt. In der hott er ganz annerscht geredt wie normal: e Hochdeutsch wie inneme Hochglanzproschpekt.

Unn „Partytime am Silbersee“ is  sei großer Hit gewes, den er uffere Single uffgenomm hott, gesponsert von de Eltere. In die Hitparade isser nit komm, obwohl er immer devon geträumt hott.

E Weiser hott emol gesat, nit diejeniche wäre arm zu nenne, deren Lebensträum’ sich nit erfüllt hätte, arm wäre die zu nenne, die nie Träume hatte.

Wie de Winnie im Januar 2009 gestorb is, wurd sei Urne im Grab von de Eltere mit beigesetzt. Die Lydia Anefeld war mit uff de Beerdichung. Sie sat, es wär bloß schad, dass kä Grabstein an de Winnie erinnere det!

Wie mer üwwerlet honn, was mer dun könnte, kame mer druff, dass sie e Spendekonto inricht unn ich die do Geschicht uffschreib unn wer sich jetz an de Koschte fer e Grabstän fer de Winnie beteiliche will, kann ebbes uffs Spendekonto üwwerweise: Konto-Nummer 1 890 132 010, Sparkasse Rhein-Nahe, BLZ 560 501 80. Unn wenn Se die Lydia Anefeld-Paliot oder mich treffe, spreche Se uns druff an, was debei erumkomm is.

     Alla dann

     Ihr Rolf Schnorreberjer